Немало вмешаност на МПЦ во матните зделки на Миладинови

	Коментари (4)

г. Тимотеј

МПЦ не е вмешана во криминалите на струшките браќа Миладинови, иако беше нивни бизнис партнер - објаснувал на седница архиепископот г.г. Стефан на владиците во Синодот.

Кредитите ги земале браќата, а поглаварот не знаел ништо. Со благослов и потпис од секретарот на МПЦ Белчовски бил земен кредит од милион евра, за другиот од германската ЛХБ Банка имало сомневања дека потписите се фалсификат.

Архиепископот Стефан сепак хотелот „Изгрев“ го купи два пати. Во 2001. не знаел дека хотелот е со хипотека, го правдаше владиката Тимотеј. Лани повторно го купи за еден и пол милиони евра.

Дали МПЦ претрпе штета и дали владиците во Синодот му веруваат на архиепископот?

„Тоа ќе ви објасни тој кога ќе ве повика да ви појасни. Ние стоиме зад сите позитивни норми коишто постојат во оваа држава и да потврдат дали е некој вмешан или невмешан“, рече г. Томотеј, митрополит дебарско кичевски.

„Во овој момент ни се презентира ова што ви го кажувам, јас немам никакви поинакви сознанија за да можам да тврдам било нешто спротивно, ниту пак 100 процентно да тврдам дека е тоа така“, додаде г. Тимотеј.

МПЦ дури позајмувала пари на Миладинови. 50.000 евра дала на заедничката фирма за браќата да поделат плата на вработените. Подоцна парите биле вратени на црквата.

Од декември браќата Миладинови се во притвор. Проневериле милионски суми евра, земале кредити кои не ги вратиле. Во матните зделки вмешани се и вработени во катастарот, судии, адвокати и нотари. Досега нема кривична пријава за ниту еден од МПЦ.

За печатење

Прати по e-mail

Порака до авторот

Разгласи