Во Македонија засега нема заболен од свински грип

	Коментари (1)

Јованка Костовска

Во Македонија нема ниту еден сомнителен случај заболен од опасниот вирус. Граѓаните самоволно да не набавуваат од лекот тамифлу, а аптеките да не го издаваат лекот без препорака на лекар.

Ова е најновата препорака од надлежните здравствени власти.

„Лица коишто биле во авионите и коишто биле во ризичните земји, меѓутоа нивниот број не е голем. Се работи за десетина лица, коишто ќе бидат под надзор“, изјави Јованка Костовска, член на комисија за заразни болести.

„Давањето на тамифлу лекови ќе биде централизирано само од здравствени работници во соодветните установи, меѓутоа никако пациентите да создадат резерви, да бараат резерви на тамифлу или самостојно да си земаат лекови“, вели Бујар Османи, министер за здравство.

Засега има 13.000 пакувања од лекот тамифлу кој се дава во првите 48 часа од појавата на симптомите. Министерство ќе набави уште 200.000 дози.

Бујар Османи

Инфективната клиника располага со 120 кревети, кои во случај на вонредна состојба можат двојно да се зголемат. Има две простории со негативен притисок, каде би се изолирале можните заразени од опасниот вирус.

Државата се подготвува на највисоко ниво за можна пандемија од опасниот вирус. Се прават оперативни планови на национално и локално ниво. На Центарот со управување со кризи и на град Скопје им е дадено задолжение да изготват план во случај на вонредна состојба.

„Ги повикувам сите институции коишто се опфатени со овие планови, и коишто имаат задолженија согласно планот, сериозно да ги сфатат своите задачи, бидејќи ние сега дејствуваме превентивно. Ќе направиме контрола на неколку болници и здравствени домови, за да се проверат дали имаат изготвено оперативни планови и како тие се спроведуваат“, вели Османи.

Се уште нема забрана за апсолвентските екскурзии, но препорака е да не се патува доколку не е неопходно. Надлежните велат нема место за паника.

„Да не се заплашуваме сега дека е тоа нешто што е многу очекувано дека ќе се случи. Ние сме апсолутно припремени да се справиме со вакво нешто“, рече Звонко Миленковиќ, директор на Инфективна клиника.

Комисијата за заразни болести постојано заседава и секојдневно ја следи состојбата. Османи вчера во Истанбул се сретнал со Марк Данзон регионален директор за европа на СЗО на кој пренел како Македонија се подготвува за евентуална пандемија од опасниот вирус.

За печатење

Прати по e-mail

Порака до авторот

Разгласи