Тале Огненовски - џез музичар на денот на allaboutjazz.com

Александра Бубевска	Коментари (8)

Тале Огненовски

Светски познатата интернет страница за џез музика all about jazz, деновиве објави статија со која му оддаде признание на македонскиот инструменталист и композитор Тале Огненовски.

Текстот се однесува на признанието кое овој сајт му го доделило на 27 април, денот на неговиот роденден, прогласувајќи го за џез музичар на денот.

Исто вакво признание имаат добиено најславните имиња на џезот како Бени Гудман, Мајлс Дејвис, Дјук Елингтон или Ела Фитџералд.

87-годишниот чичко Тале, уште во 1956 година настапувал во „Карнеги Хол“ во Њујорк, работел во „Танец“ и во многу други ансамбли, негова се уште неисполнета желба е да сними што повеќе од неговата музика.

„Сега мене ми претстои само да ја снимам цела музика. Имам 150 ора што сум компонирал, јас одев по сите друштва, и во Битола, кларинистите да учат, без пари свирев 20 години. Е сега, Тале ќе го викнеме, одам - пари не сакам. Имаат некои изјави дадено - не сака Тале пари“, вели Тале Огненовски.

Огненовски свири на кларинет, зурла, гајдарка и кавал, американската продуцентска куќа „Индепендент“ има издадено три албуми со негова музика, но минатата година на конкурсот за финансирање на проекти од национален интерес бил одбиен од комисијата на Министерството за култура, сепак тој не се откажува.

„Да ја снимам цела музика, некој го фаќа паника - овој уште не умира, а не сум за умирање, ќе творам и ќе снимам, да ве насмеам“, рече Тале Огненовски.

Тале Огненовски има компонирано и аранжирано 150 македонски народни ора, еден класичен концерт насловен „Тале Огненовски концерт за кларинет бр.1“ и 12 џез-композиции.

За печатење

Прати по e-mail

Порака до авторот

Разгласи