Од утре барања за преостанатите субвенции
04.10.2009 18:48
Земјоделците од утре можат да конкурираат за преостанатите субвенции за сточарството и растителното производство. Овие мерки се и последните од годинешната програма за финансиска поддршка на земјоделството. Од растителното производство, земјоделците можат да конкурираат за субвенции за индустриски и градинарски култури предадени во преработувачки капацитети, предадено грозје во домашни визби, а во оваа категорија се е мерките за субвенции за произведен сертифициран семенски и саден материјал. Сточарите, во овој период треба да поднесат барања за субвенцијата за предадено млеко во периодот од мај до септември годинава, но исто така можат да аплицираат и за субвенциите за продадени говеда, гоеници и кокошки во кланици, добиено теле по вештачки пат, набавени приплодни говеда, овци и кози, произведени еднодневни пилиња, набавка на матици и подигање на нови површини со медоносна флора. Сточарите пополнетите барања за субвенции до подрачните единици на Министерството за земјоделство треба да ги поднесат најдоцна до 25. овој месец. Рокот за аплицирање за субвенциите за субвенциите за растително производство е до 5. ноември. Од Платежната агенција велат дека им стојат на располагање на земјоделците за сите нејаснотии. Со цел полесно да дојдат до субвенции, веќе еден месец во Платежната агенција во функција на земјоделците работи „Call центарот“, со што телефонски можат да ги добијат сите информации. Исплатата на последните субвенции ќе се врши преку Платежната агенција, по завршувањето на контролите на терен. Досега се исплатени околу 50% од годинешните 70 милиони евра субвенции за земјоделството.
|