Донесени пресудите за членовите на „17. ноември“
08.12.2003 00:00
Грчкиот суд денеска ги донесе пресудите за 19-те обвинети членови на терористичката организација „17. Ноември“. Петнаесет од обвинетите се прогласени за виновни, додека четворица, меѓу кои и едниствената жена Ангелики Сотирополу, се ослободени од обвиненијата. „Мозокот“ на организацијата Александрос Јатопулос е прогласен виновен по 963 обвиненија, а правните експерти соопштија дека тој може да добие неколку доживотни казни затвор. Судскиот процес против 19-те членови на „17. Ноември“ почна на 3 март и по 162 сесии, заврши на 24 ноември. Обвинителството имаше повеќе од 350 сведоци од кои 40 беа странци. Одбраната ангажираше 150 адвокати за вкупно 2.000 обвиненија. Се очекува казните да бидат соопштени кон крајот на неделава. Апсењето на членовите на 17Н, организација за чие потекло и состав постојат многубројни верзии, со децении беше постојано барање на САД кон Грција, и еден од главните елементи за подготовка на безбедноста на Летните олимписки игри во Атина, во август 2004 година. Наречена по датумот на студентскиот бунт против тогашната воена диктатура во 1973 година, 17Н, од 1975 година до 2000 година, уби 23 странски и домашни официјални претставници и бизнисмени и изведе десеттина бомбашки напади што ги признаваше преку соопштенија објавени во печатот. Последната жртва на 17Н, во јуни, 2000 година, беше британскиот воен аташе во Атина Стивен Сондерс, кој, според организацијата, беше убиен бидејќи бил еден од планерите на напади против НАТО на тогашна Сојузна Република Југославија во 1999 година.
|