Малолетниците се изложуваат на опасност преку интернет блоговите
22.02.2006 00:00
Неодамна спроведената студија на американскиот универзитет Норвестерн покажала дека повеќето малолетници кои пишуваат блогови, популарни он-лајн дневници, на нив ги оставаат своите лични податоци, со што се изложуваат на потенцијална опасност, како од сајбер насилниците, така и од оние од „крв и месо“. Студијата направена на 68 по случаен избор блогови направени од деца на возраст од 13 до 17 години, при што е откриено дека дури 75% од тинејџерите го напишале своето вистинско име, 67% својата возраст, 61% напишале некој контакт во форма на и-мејл адреса. Околу 60% од малолетниците кои одржуваат блог и ги објавиле своите податоци, го откриле и градот или државата во која живеат. Дури половината од малолетниците вклучени во оваа студија, ги навеле адресите на блоговите на своите пријатели, а 70%оставиле можност посетителот да им остави коментар. Сепак, стручњаците кои ја спровеле оваа студија наведуваат дека блоговите имаат позитивна улога во развојот на писменото изразување на младите луѓе и можат да послужат како добар медиум за размена на информации, а фактот дека од своите читатели добиваат одредена позитивна повратна информација може да им послужи како добар начин на одржување и развивање на општествени контакти. Не е за чудење - дури 71% од вклучените во студијата ги коментирале настаните во своето училиште, а околу 50% своите он лајн дневници ги користат за да расправаат за актуелните музички настани. Позитивната страна на блоговите често е под сенка на негативната, така што не е ретко малолетниците, токму поради објавените лични податоци, да станат цел на сексуално изопачените насилници или на некој друг начин негативно расположени возрасни или пак врсници.
|