Кичевскиот убиец се самоуби

Маја Блажевска	Коментари (14)

Владо Таневски

„Не ги сторив убиствата“. Ова го пишува во своето проштално писмо кичевскиот новинар Владо Таневски, обвинет за сериски убиства, кој ноќеска си го одзеде животот во притворското одделение на тетовскиот затвор.

„Напишал дека е горд на своето семејство, дека се гордее со семејството и дека не ги сторил убиствата за коишто беше осомничен“, изјави Иво Котевски, портпарол на МВР.

Таневски самоубиството го извршил давејќи се во кофа со вода во тоалетот, додека силно била пуштена чешмата за да не се слушнат звуци во ќелијата, каде биле уште тројца притвореници, информираа правосудните органи.

„Вечерта, откако подолго време не излегол од тоалетот, реагирал еден од притворениците, го забележал неговото отсуство, влегол во тоалетот и го нашол, забележал Владо Таневски како се наоѓа со главата во кофа со вода“, рече Јордан Михајловски, Управа за извршување на санкции.

Нејасно е како Таневски успеал да се самоубие, кога неговата состојба будно се следела. Според затворските власти во Тетово, Таневски не покажувал суицидални знаци и нормално се однесувал.

„Обидот на службата за обезбедување, уште од првиот момент кога биле повикани од страна на другите притворени лица, и тоа докажува дека намерно не го оставивме сам во ќелија“, вели Нуриман Тефику, директор на затворот во Тетово.

„Токму заради ваквите случаи го оставивме со други три лица за тие да го запазат, нешто да гледаат, но човекот, по мое мислење, бил цврсто убеден во тоа да оди до самоубиство, значи чекал другите да спијат и да изврши самоубиство“, рече Тефику.

За експертите останува мистерија како е извршено самоубиството, бидејќи како што тврдат, невозможно е некој да си го одземе животот давејќи се во кофа со вода.

И полицијата истражува дали освен вода, во садот имало и некакво друго средство.

„Подигната е и кофата во којашто е извршено самоубиството за евентуално да се утврди да не имало во неа ставено и некаква друга течност со којашто осомничениот би се затрул“, додаде Котевски.

Обдукцијата на Институтот за судска медицина ќе покаже во какви околности настапила смртта кај Владо Таневски.

Самоубиството на новинарот, според полицијата, дополнително ќе ја отежне истрагата за неколкуте убиства на средовечни жени од Кичево.

Таневски пред два дена беше притворен за убиство на две жени, а се утврдува неговата вмешаност во уште две други убиства.

За печатење

Прати по e-mail

Порака до авторот

Разгласи