Бројoт на затруени расте - 73, од нив 16 деца

Менче Атанасова Точи	Коментари (6)

Зачестени столици, пет-шест во 24 часа

73 затруени, од кои 16 деца, побарале лекарска помош на Инфективната клиника, од вчера напладне до денеска. 13 од нив во тешка здравствена состојба се хоспитализирани.

Ова е билансот од саботното масовно труење со слатки добиено од слаткарницата „Риниа“ во старата Скопска чаршија.

„Зачестени столици, од пет, шест во 24 часа, а имаме случаи кога има 20-30 столици, тоа се потешките форми на болеста. Се што е температура повеќе од четири-пет дена, се што е над 20-тина столици, појава на крв во столица - тоа значи дека и амбулантските случаи треба повторно да побараат помош бидејќи развојот на болеста сепак, си има еден свој тек“, рече д-р Благица Јоксимовиќ, Инфективна клиника.

Синоќа на Инфективна се случуваше вистинска драма. Цели семејства доаѓаа затруени со дијареја, температура, болки во стомакот, повраќање.

Санитарната инспекција утринава, поради отпор на сопственикот, со асистенција на полицијата ја затвори слаткарницата. Екипата на А1 со закани беше спречена да го снима објектот.

Но, неколку часа подоцна беше повторно отворена, лентата отстранета, а граѓаните на големо купуваа торти и колачи за утрешниот празник.

Цели семејства затруени

Инспекторите успеале да земат мостри за анализа од слатките, амбалажата, работните површини и вработените. Наложена е комплетна дезинфекција на објектот.

„Ќе биде затворен се додека не се отстранат сите недостатоци и не се утврдат причините за труењето“, вели Шемси Муса, директор на Санитарна инспекција.

Од Инфективната клиника се мобилизираат - очекуваат нови случаи во наредните денови.

Но, попладнево, слаткарницата „Риниа“ повторно беше затворена. Инспекторатот соопшти дека во повторна обиколка на слаткарницата, уште еднаш е ставена пломба на дуќанот.

Инаку, министерот за здравство Бујар Османи попладнево изјави дека за зачестените труења виновници се самите производители. Се правдаше дека колку и да има инспектори тие не можат да стасаат насекаде.

За само еден месец ова е втора епидемија на труења со слатки во Скопје. Наместо рамазанскиот пост да го поминат празнично, со своите семејства, многумина граѓани завршија токму на Инфективната клиника.

За печатење

Прати по e-mail

Порака до авторот

Разгласи