Каде е малата Ангела?

Дарко Штаргоски	Коментари (22)

И по 12 дена од исчезнувањето на Ангела од мариовско Дуње, се уште нема никаква трага, ни глас за неа.

Денеска во посета на семејството дојде министерот за труд и социјална политика кој им даде еднократна парична помош од 30 илјади денари, а општина Прилеп им помогна со 15 илјади денари. Но парите ги примија роднините, бидејќи таткото на Ангела бил на работа, а мајката била повикана на информативен разговор во полиција.

„Причина за нашето гостување тука е да дадеме морална поддршка на семејството и да кажеме дека државата и владата се заедно со семејството во овие најтешки моменти за нив“, изјави Џелал Барјрами, министер за труд и социјална политика.

„Дојдовме да дадеме една морална поддршка за семејството и да дадеме една мала парична помош која верувам дека ќе им се најде на ова сиромашно семејство во овие тешки моменти за нив“, вели Марјан Ристески, градоначалник на Прилеп.

Од полицијата не сакаа конкретно да кажат дали има некоја нова трага што мајката повторно по 12 дена се вика во полиција. Велат тоа било нормален дел од истрагата. Денес исто така се исцрпуваше водата од бунарот кој се наоѓа веднаш до куќата на Ангела. И за тоа полицијата немаше некој конкретен одговор зошто бунарот кој се наоѓа најблиску до куќата се испитува дури денес. Според нив бунарите во селото се испитувале последни за да жителите имаат вода. До сега биле испитани 10-тина бунари.

„Тоа зошто денес го испитуваме бунарот е работа на полицијата, истрагата најверојатно има покажано некакви траги, ние се вклучуваме по барање на полициската станица“, рече Станко Колески, командир на противпожарна бригада Прилеп.

Инаку до сега се испрашани сите жители на дуње и околните села. Пребарани се сите куќи, но не се најде никаква трага. Дел од трагите кои постоеја за ангела завршуваа кај селската црква.

За печатење

Прати по e-mail

Порака до авторот

Разгласи