Единствениот вселенски тоалет се расипал
29.05.2008 12:35
Астронаутите на Меѓународната вселенска станица под итно побарале од НАСА водоводџија, бидејќи им се расипал единствениот тоалет и моментално немаат каде да извршуваат нужда. За жал, НАСА може да им испрати мајстори најрано идната недела, кога во вселената ќе одлета Шатлот Дискавери. Трочлениот екипаж до тогаш ќе мора да се снаоѓа или да се обидат сами да го поправат тоалетот. Од минатата недела не работи моторот на вентилаторот и се јавуваат проблеми со складирање на течниот отпад, но за среќа, механизмот за цврст отпад добро работи. Руските стручњаци, кои го направиле тоалетот, велат дека не знаат што би можело да го предизвика ова расипување, поради што не можат од Земја да му помогнат на екипажот да го поправат тоалетот. Астронаутите извесен период го користеле тоалетот на капсулата Сојуз, но тој има ограничен капацитет. Дискавери ќе биде лансиран во сабота од Кејп Канаверал во Флорида, а стручњаците на НАСА сега имаат голем проблем, бидејќи товарот на леталото е одамна пресметан, поради што сега од него ќе треба нешто да се изнесе за да се внесат делови за тоалетот.
|